حل لبعض مشاكل اللومينا والكابرس من 2000 وحتى 2006

من طرف وفترقنا..؟ الأربعاء فبراير 10, 2010 7:22 pm

1- القير ومشكلة التاخير او سماع حنة بين النمر :
اذا حسيت بان القير يطول بالنمر او بديت تسمع له صوت مثل الحنه خصوصا في النمرة الثالثة او الثانية فهذه بداية احتراق الكلاتشات واذا طولت اكثر واكثر راح تحترق كلياً ووقتها السيارة ماراح تصير فيها الا نمرتين بس الاولى والثانية ,, طيب وش الحل ؟
الحال طال عمرك والافضل أنك توظب القير بلا شك وتركب كلاتشات جي ام اصلية مع العلم انه يوجد نوعيات ثانية لكن انا اتكلم عن تجربة شخصية
تركب كلاتشات جي ام اصلي ومبرد قير كبير سعره مع التركيب تقريبا 400 ريال , واذا كنت صاحب قومات ودعس ينصح انك تركب ترانز قو والشغلات هذي تتركب في ورش توظيب القيور واذا كنت من الشرقية فيه شخص له سمعة كبير وفنان ماشاءالله تبارك الله في شغله وهو معروف اذا كان اي شخص يبغى رقمه يرسل لي على الخاص وانا ارسل له الرقم .

2- الهوبات ومشكلة الرجه + الفحمات بسرعه تخلص :
طبعا هذي مشكلة معروفة انك لو تخرط الهوب مليون مرة الرجه ترجع مرة ثانية وايضا يصاحبها ان الفحمات تنتهي بسرعه ,, فيه نوع من الهوبات رياضي سعره تقريبا من 350 الى 400 ريال لونه ذهبي وتحصله مخرم هذي يركب بدون توليف انا استخدمته بصراحة ممتاز جدا بحيث اني ركب فحمات بدون ما اخرط ولكن مع الوقت الطوووويل يرجع يرج والحل انك تخرطه وراح يرجع من جديد مايرج والملاحظ على الهوبات هذي ان الفحمات ماتنتهي بسهولة ,, واماكن بيع الهوبات هذي بالشرقية بمحل اوتو مول والايام الاخيرة انتشرت الهوبات هذي لدرجة انك تحصلها بالامكان العادية لكثرة الطلب عليها ,, فيه اشخاص جربوها وكانت النتيجة سيئة بالنسبة لهم بسبب عيب مصنعي بس اتوقع الان تلافوا المشكلة هذي

3- الحرارة :
الان جا الصيف وجات المشاكل معه
واحيانا بعض الاشخاص يصادفون ارتفاع درجة الحرارة عندهم فينصح انك تتاكد من الشغلات هذي , 1- انك تركب موية حمراء نوع اي سي ديلكو اصلية قيمتها من 60 ريال الى 70 ريال , 2- تتاكد من المراوح انها شغالة , 3- بالاخير تسوي تسييخ للراديتر قيمته من 70 ريال الى 100 ريال تقريبا

4- الحرارة ترتفع اذا كنت واقف :
هذي اغلب الظن انها المروحة الكبيرة تعطلت واحسن حل انك تغيرها بوحده جديدة اصلية قيمتها 550 ريال

5- صوت تك تك تك يطلع احيانا اذا كانت السيارة واقفة او باردة وفجاه يروح :
طرمبة الزيت عندك ضعيفة ولاتضخ زيت الى اعلى المكينة فاحسن شي انك تتلاحق نفسك وتغير الطرمبة قبل لاتوظب مكينة او تغير شغلات ثانية
سعر طرمبة الزيت الاصلية من 400 ريال الى 600 ريال .

6- علامة تشيك انجن :
هذي صعب اي شخص يعطيك السبب الرئيسي في هذي المشكلة علشان كذا الحل الوحيد انك تروح تفحس كمبيوتر ويحدد لك العطل الاساسي في السيارة من ايش وسعر فحص الكمبيوتر من 60 ريال الى 100 ريال .

7- المسجل مايشغل سيديات :
السبب هو ان عدسة المسجل يبغى لها تنظيف او اعطيك حل على السريع من واقع تجربة شخصية ,, روح لاقرب بنشري وخذ منفاخ الهواء القوي وطلع كل السيدياات واجلس انفخ داخل المسجل .

8- الانوار ضعيفة او الكهرباء تضعف او ظهور علامات فجاه على الطبلون :
هي اغلب الظن انها من البطارية والافضل انك تركب بطارية 80 امبير ,, او انها تكون من الدينمو .

9- تدخل المفتاح تحاول تشغل السيارة لكن المفتاح لايتحرك لايمين ولا يسار :
عندك مشكلة بالقفل حاول تشحم المفتاح وتجرب حظك او تهز السيارة والحل الاكيد انك تفتح القفل وتروح تشري واحد من الوكالة بـ 170 ريال وتاخذ القديم وتوديه لمحل مفاتيح او محلات الذهب المختصه بالاقفال ويزينه لك على نفس المقتاح القديم .

10- تسمع صوت مزعج اثناء المشي او الانعطاف:
مثل ( ووون ووووون ووووون ) يزيد الصوت على حسب السرعه او تسمع بشكل ملحوظ اذا لفيت الى جهة معينة مثلا يمين او يسار هذا من برنق الجنط وسعر الواحد الاصلي 600 ريال هو عموم واحد يخترب مايختربون الاثنين مع بعض الا نااااادر

11- صوت ضجه او السيارة ترج بشكل قوووي خصوصا وهي واقفه :
هذي المكشلة غالبا تكون من كراسي المكينة يعني عندك الكراسي تعبانه والله لايهينك تغيرهم سعر الكرسي الواحد فيه انواع من 100 ريال الى 250 ريال تقريبا ( الاسعار غير اكيدة 100 % )

12- رجه بالدركسون عند سرعه معينة تظهر فجاه وتروح عند سرعة معينة :
هذي عندك واحد من الاثنين : يا الكفرات تحتاج ترصيص , او انك مركبهم عكس اتجاه السهم اللي مرسوم على الكفر ,, أو جلد الكردان عندك تعبانه ( الجلد اللي بنهاية العامود ) سعرها الاصلي تقريبا 500 ريال

13- جهاز مانع الانزلاق ( التراكشن ) لايعمل :
هو نادر يتعطل واذا تعطل راح تظل علامة التراكشن اووف شغالة على طول الى ان يتم اصلاح العطل ,, وغالبا تكون من الفيوز انه حرقان وقيمته من 5 ريال الى 10 ريال تقريبا ,, مع العلم انك لو رحت فحصت كمبيوتر على المشكلة راح يقولك العامل تحتاج الى جهاز مانع انزلاق جديد والسبب انه مافيه اشارة كهربائية صادرة من الجهاز نفسه لان الفيوز حرقان يعني زبدة الكلام قبل ماتسوي او تفحص تاكد من الفيوز

14- البريك مايمسك بقوة وتحس انه ضعيف وتسمع صوات هواء اذا دعست بريك ورجلك تروح لداخل اكثر مع ظهور علامة تيشك انجن احيانا واحيانا ماتطلع :
اذا كان المشكلة كذا
هذا عندك الباكم تعبان ولازم تغييره
وسعره حوالي 500 الى 550 ريال اصلي انا شريت واحد لكن من فترة طوويلة
الباكم هو القطعه السوادء اللي موصول فيها علبة زيت البريك
تحصلها قريبة مرة من الطبلون ولونها اسود وهي شكلها دائري كبير
بس انت قبل لاتغير تاكد من العامل