قصيدة موعظة, حفظ اللسان, اختيار الصديق , بر الوالدين,,,,,,

من طرف أبو الليل الأحد فبراير 21, 2010 8:55 pm

السلام عليكم ورحمه الله
قصيده حلووه لا تفوتكم

يالله اغفر زلت اللي راجيٍ عفوك ذليــلا *** يارجا عبدٍ لجا بك دون ذاك ودوك ذاكـــا

يا إله الكون كله يارحيم وياوكيـــــلا *** يا غفور المن تكبر وارتكب ذنب وعصاكــا

يا عزيز وياودود وياعليم وياجليـــــلا *** يا رحيم ويامجيب اللي بدعواته نصاكـــا

يا جليل اعن الشبيه وعظيمٍ عن مثيــــلا *** يالطيف وياخبير ويافرج عبدٍ دعاكــــــا

أسألك وانته رجايه تشفي القلب العليـلا *** تنقذه من هم جوفه وارزقه وهبت هُداكـــا

طهره من كل غل وجنبه عن كل ميـــــــلا *** واجعل أقدام الرجل ماتمشي الافي رضاكــا

واجعل اعيوني نظرها في بدع صنعك يخيـلا *** في جبالك في بحورك في أراضيك وسماكـــا

واجعل الساني بذكرك يلهج ويذكر طويــلا *** واحفظه عن كل هرجٍ يورده درب الهلاكــــا

واجعل القرآن نور القلب هو نهج ودليـلا *** واجعله ربيع قلبٍ قاسيٍ قسوة صفاكــــــا

واجعله نورٍ لقبري بعد ماصبح به نزيــلا *** لا وضعت ابداخله والربع خلَّوني هُناكــــا

في ظلام القبر مالي لا رفيق ولا خليــــلا *** ما ينجِّي من ظلام القبر واهواله سواكـــا

هذا هو يامن تريد اتعيش في جوٍ جميـــلا *** والسعاده مبتغاك ومطلبك وايضا مُناكـــا

والهموم اللي تجي لك بين صبح وبين ليلا *** ترتجي عنك تزل وترتجي منها فكاكــــــا

خلِّ منهاج الشريعه لك طريق ولك سبيـــلا *** واحذر احذر لاتطاوع نفسك احذر من هواكـا

واحذر الشيطان لاتصبح من اجنوده عميــلا *** واعرف انه والهوى والنفس من أكبر عداكا

وامسك السانك من الهرج الذي ماله حصيلا *** كلمةٍ ما تنفعك في دينك اتركها وراكـــا

وابتعد لاتقرب اللي هرجهم قالٍ وقيــــلا *** في قفا غيرك هرج لك وانت يهرج في قفاكا

النميمه يافتى في المجتمع تشعل فتيــلا *** كم تفرق مجتمع ناسٍ على الخوه شراكــــا

وان بغيت اترافق احدٍ لا تماشي لك خبيـلا *** ارتفع بالنفس عن خبلٍ ينزل مستواكـــــا

الخبل ممشاه دايم عن هل الطاله يغيــلا *** عزتك تترك طريقه كانه ابشرَّه بلاكــــــا

رافق اللي مجتمعهم مجتمع خيرٍ فضيــــلا *** واترك اللي مجتمعهم مجتمع يجلب شقاكــا

وان لفاك الضيف هلّ وبد له بنٍ وهيــــلا *** وافلج الحاجب لضيفك لا عنا يمّك وجاكـــا

وعن حقوق امك وابوك اخذ النصيحه لاتميلا *** أمك الصدر الحنون ؛ و والدك كد ورباكـا

احملتك امك شهور ابَّطنها حملٍ ثقيـــــلا *** تسعة اشهور ابحشاها ما تجزَّع من غثاكــا

وارضعتك أمٍ لبنها ؛ ذقت حلوٍ سلسبيـــلا *** عام بعد العام الاول وانت مشروبك هذاكـا

حالها من كثر ما تسهر عليك اصبح نحيـلا *** ما تنام الليل كله ؛ دام ما يهدي بُكاكا

ان مرضت ايصيبها هم وحزن يشعل شعيـــلا *** وان تشافيت الهموم اتزيل عنها مع شفاكا

لو عملت المعجزات ؛ ولو عملت المستحيلا *** فضلها صعبٍ تطوله ؛ لو كثر فيها صخاكــا

والأبو لاجلك يكد ويكدح ويشقي طويـــــلا *** ما تذوق النوم عيينه دام ما حضَّر عشاكا

يرتجيك اتصير عونه لا غدا جسمه هزيـــلا *** وانقضى وقت الشباب ؛ وفوق معكازه تراكى

خلك ـ الله لا يهينك ـ في يده سيفٍ صقيلا *** عضده الايمن وزنده ؛ وين ما وجَّه لقاكــا

تمت وصلوا على خير البشر عد النخيـــلا *** وعد همَّالٍ لغيثٍ ؛ ما ظهر نبت الدكاكـــا

وسلامتكم
مع تحيات أبو الليل
منقول قصيدة موعظة, حفظ اللسان, اختيار الصديق , بر الوالدين,,,,,, Biggrin